काठमाडाैं, १५ असाेज । आज अन्तर्राष्ट्रिय ग्रामीण महिला दिवस । प्रत्येक वर्ष अक्टोबर १५ का दिन विश्वभर अन्तर्राष्ट्रिय ग्रामीण महिला दिवस मनाइन्छ। ग्रामीण क्षेत्रमा बस्ने महिलाहरूको महत्वपूर्ण भूमिका, योगदान र उनीहरूले भोग्नुपरेका चुनौतीहरूप्रति विश्वको ध्यानाकर्षण गराउने यस दिवसको मुख्य उद्देश्य हो।
यो दिवस पहिलो पटक सन् १९९५ मा महिला विश्व शिखर फाउन्डेसनद्वारा मनाइएको थियो। पछि संयुक्त राष्ट्रसंघीय महासभाले डिसेम्बर १८, २००७ मा पारित गरेको प्रस्तावमार्फत यसलाई आधिकारिक रूपमा मान्यता प्रदान गर्यो र सन् २००८ देखि संयुक्त राष्ट्रसंघका आ-आफ्ना निकायहरूसँगको सहकार्यमा निरन्तर मनाउन थालियो।
कृषि उत्पादन, खाद्य सुरक्षा, गरिबी निवारण र प्राकृतिक तथा वातावरणीय व्यवस्थापनमा ग्रामीण महिलाहरूको ठूलो योगदान रहेको हुन्छ। उनीहरू कृषि क्षेत्रको मेरुदण्डका रूपमा रहे तापनि अधिकांश ग्रामीण महिलाहरूले आफ्नो श्रमको उचित मूल्यांकन, स्वामित्व र अवसरबाट वञ्चित हुनुपरेको यथार्थलाई यो दिवसले उजागर गर्दछ।
विश्वभरका ग्रामीण महिलाहरूले भूमिमा समान स्वामित्व, वित्तीय सेवाहरूमा पहुँच, शिक्षा, गुणस्तरीय स्वास्थ्य सेवा र निर्णय प्रक्रियामा सहभागिताको अभाव जस्ता गम्भीर लैङ्गिक असमानता र कठिनाइहरूको सामना गर्नुपरेको छ।
ग्रामीण क्षेत्रका महिलाहरूको आर्थिक सशक्तीकरण गर्ने, उनीहरूको अधिकार सुनिश्चित गर्ने र उनीहरूलाई आवश्यक पर्ने स्रोत–साधनमा समान पहुँच पुर्याउन राज्य तथा अन्तर्राष्ट्रिय समुदायलाई प्रेरित गर्नु यस दिवसको प्रमुख ध्येय हो।
अन्तर्राष्ट्रिय ग्रामीण महिला दिवसले कृषि र ग्रामीण विकासको क्षेत्रमा महिलाहरूले पुर्याएको अतुलनीय योगदानको कदर गर्दै उनीहरूको जीवनस्तर उकास्न ठोस कदम चाल्नुपर्ने आवश्यकतामा जोड दिन्छ।
