काठमाडौं, २६ असोज। हाल देशमा पश्चिमी न्यून चापीय प्रणालीका साथै मनसुनी वायुको प्रभाव कायम रहेको छ।
जल तथा मौसम विज्ञान विभाग, मौसम पूर्वानुमान महाशाखाका अनुसार हाल बागमती र गण्डकी प्रदेशका पहाडी तथा हिमाली भूभागका साथै कोशी, लुम्बिनी, कर्णाली र सुदूरपश्चिम प्रदेशका हिमाली भूभागमा आंशिक बादली लागेको छ भने बाँकी भूभागमा मौसम सामान्यतया सफा रहेको छ।
दिउँसो देशका हिमाली र पहाडी भूभागमा आंशिक बादली लाग्ने तथा तराई भूभागमा मौसम मुख्यतया सफा रहनेछ। कर्णाली प्रदेशका हिमाली र पहाडी भूभागका थोरै स्थानमा तथा कोशी, बागमती, गण्डकी, लुम्बिनी र सुदूरपश्चिम प्रदेशका हिमाली र पहाडी भूभागका एक(दुई स्थानमा हल्का वर्षा र हिमपातको सम्भावना छ।
राति भने देशको हिमाली भूभागमा आंशिक बादली लाग्ने तथा पहाडी र तराई भूभागमा मौसम मुख्यतया सफा रहनेछ। तराईका थोरै भूभागमा बिहानपख हुस्सु लाग्ने सम्भावना छ। गण्डकी र कर्णाली प्रदेशका हिमाली भूभागका एक(दुई स्थानमा मेघगर्जन र चट्याङ्गसहित हल्का वर्षा र हिमपात हुन सक्नेछ।
कोशी, कर्णाली र सुदूरपश्चिम प्रदेशका हिमाली र पहाडी भूभागका थोरै स्थान तथा बागमती, गण्डकी र लुम्बिनी प्रदेशका हिमाली र पहाडी भूभागका एक दुई स्थानमा मेघगर्जन र चट्याङ्गसहित मध्यम वर्षाको सम्भावना रहेको छ। यसबाट बच्न तथा सतर्कता अपनाउन महाशाखाले सर्वसाधारण र सरोकारवाला निकायहरूलाई नियमित रूपमा पछिल्लो मौसमी सूचना जानकारीमा राखी आवश्यक पूर्वतयारी गर्न अनुरोध गरेको छ।
