साउन २६, काठमाडौं । १४औँ लि–निङ पुष्पलाल स्मृति राष्ट्रिय वरीयता ब्याडमिन्टन प्रतियोगिता सोमबारदेखि ललितपुरको ग्वार्कोस्थित यल स्पोर्ट्स एकेडेमीमा सुरु भएको छ।
नेपाल खेलकुद महासंघअन्तर्गत राष्ट्रिय ब्याडमिन्टन संघ नेपालको आयोजना तथा यल स्पोर्ट्स एकेडेमीको सहआयोजनामा प्रतियोगिता सञ्चालन भइरहेको हो। कार्यक्रम को उद्घाटन नेकपा एमालेका सचिव तथा पोलिटब्युरो सदस्य भानुभक्त ढकालले गर्नु भएको थियो । प्रतियोगिताको मुख्य प्रायोजकमा ब्याडमिन्टन सामग्री उत्पादक कम्पनी लि–निङ रहेको छ।
साउन ३० गतेसम्म सञ्चालन हुने प्रतियोगितामा नेपाल ब्याडमिन्टन संघसँग आबद्ध ६० जिल्ला तथा तीन विभागीय टोलीका खेलाडी सहभागी छन्। पछिल्लो विवरणअनुसार प्रतियोगितामा ५१८ खेलाडीले १५ विधामा प्रतिस्पर्धा गरिरहेका छन्।
प्रतियोगितामा शीर्ष आठ वरीयताका महिला तथा पुरुष एकल, शीर्ष आठबाहेकका महिला तथा पुरुष एकल, महिला तथा पुरुष खुला युगल, यू–११, यू–१५ र यू–१९ छात्र तथा छात्रा एकल, ३५ वर्षमाथिको खुला युगल तथा ४५ र ५५ वर्षमाथिको मास्टर्स खुला युगल विधा समावेश छन्।
उद्घाटन समारोहमा खेलकुद क्षेत्रका पदाधिकारी, खेलाडी तथा विभिन्न क्षेत्रका व्यक्तित्वहरूको उपस्थिति रहेको थियो। आयोजकका अनुसार ४५ र ५५ वर्षमाथिको मास्टर्स खुला युगलमा विदेशी खेलाडीसमेत सहभागी हुँदैछन्। पाकिस्तान ब्याडमिन्टन संघका अध्यक्ष तथा ब्याडमिन्टन विश्व महासंघका सदस्य वाजिद अली चौधरीको पनि प्रतियोगितामा उपस्थिति रहने बताइएको छ।
प्रतियोगितामा शीर्ष आठ वरीयता महिला तथा पुरुष र शीर्ष एक वरीयता महिलातर्फको खेल लिग कम नकआउटका आधारमा हुनेछ । शीर्ष आठका खेलाडीलाई दुई समूहमा विभाजन गरिनेछ । समूहबाट प्रथम र द्वितीय स्थान प्राप्त गर्ने खेलाडीहरू सेमिफाइनलमा प्रवेश गर्ने छन् । लिगमा खेल खेल्ने खेलाडीले सहभागिता भएबापत नगद एक हजार ५०० प्राप्त गर्नेछन् । प्रत्येक विजय बापत थप एक हजार ५०० प्राप्त गर्नेछन् ।
प्रतियोगितामा विजयी खेलाडीले नगद ५० हजार प्राप्त गर्ने छन् । उपबिजेताले नगद ३५ हजार प्राप्त गर्नेछन् । यस्तै तृतीय हुने खेलाडीले १५ हजार प्राप्त गर्नेछन् । शीर्ष आठ बाहेकका पुरुष/महिला एकलमा विजयी खेलाडीले नगद ३० हजार, उपविजयी खेलाडीले नगद १५ हजार र तृतीय स्थान प्राप्त गर्ने दुई खेलाडीले सात हजार ५०० प्राप्त गर्नेछन् । यस्तै महिला पुरुष युगलतर्फका शीर्ष तीनले ४० हजार, २० हजार र १० हजार नगद प्राप्त गर्नेछन् । यु–११ तर्फका विजयी खेलाडीहरूले क्रमशः नगद १५ हजार, आठ हजार र चार हजार, यु–१५ तर्फका विजयीले नगद २० हजार, १० हजार र पाँच हजार तथा यु–१९ का विजयीले नगद ३० हजार, १५ हजार र ७ हजार ५०० प्राप्त गर्नेछन् । ३५ वर्षमाथिको युगल, ४५ र ५५ वर्षमाथि मास्टर्सका शीर्ष तीन स्थान प्राप्त गर्ने खेलाडीले नगद ४० हजर, २० हजार र १० हजार प्राप्त गर्नेछन् ।
