भदौ ६, काठमाडौं । कुवेतमा विषाक्त मदिरा सेवनका कारण ज्यान गुमाएका १२ नेपालीमध्ये ५ जनाको शव नेपाल ल्याइएको छ । कुवेतस्थित नेपाली दूतावासका अनुसार बाँकी ७ जनाको शव पठाउने प्रक्रिया सुरु भएको छ ।
ज्यान गुमाउनेमा मोरङ, स्याङ्जा, लमजुङ, ताप्लेजुङ, भोजपुर, नवलपरासी र कपिलबस्तुका नागरिक छन् । श्रम सहचारी गिरिप्रसाद आचार्यका अनुसार १३ जना अस्पतालमा उपचाररत छन्, जसमध्ये ७ जना आईसीयूमा छन् भने बाँकी डिस्चार्जको प्रक्रियामा छन् ।
यसअघि १६ नेपालीको मृत्यु भएको समाचारप्रति उनले खण्डन गर्दै जम्मा २३ जनाको मृत्यु भएको बताए, जसमा १२ नेपाली र अन्य नेपाली भाषी तथा विदेशी नागरिक छन् ।
कुवेत प्रहरीले विषाक्त मदिरा उत्पादन र बिक्रीमा संलग्न ६७ जनालाई पक्राउ गरेको छ, जसमा नेपाली पनि हुन सक्ने आशङ्का छ । पक्राउमध्ये एक बङ्गलादेशी नागरिकमाथि आपराधिक नेटवर्क सञ्चालनको आरोप छ ।
प्रहरीले ६ कारखाना नियन्त्रणमा लिएको छ भने ४ कारखाना सञ्चालनको तयारीमा थिए । कुवेतमा मदिरा उत्पादन र आयात प्रतिबन्धित छ, तर अवैध रूपमा उत्पादन हुने गरेको छ ।
स्वास्थ्य मन्त्रालयका अनुसार १६० जना बिरामी छन्, जसमध्ये ५१ जनालाई मिर्गौला डायलाइसिस र ३१ जनालाई भेन्टिलेटरमा राखिएको छ । भारतीय दूतावासले ४० भारतीय अस्पताल भर्ना भएको जनाएको छ ।
