मंसिर १२, काठमाडौँ । मुलुकलाई विस्फोटक पदार्थमा आत्मनिर्भर बनाउन नेपाली सेनाले थप विस्फोटक पदार्थ उत्पादन गर्ने भएको छ । त्यसका लागि मकवानपुरको सुनाचरीमा नयाँ कारखाना स्थापना गरिने छ ।
नयाँ कारखानाले राष्ट्रिय गौरवका आयोजनाहरूको निर्माणमा पनि सहयोग गर्ने नेपाली सेनाको विश्वास छ । सुनाचरीमा स्थापित सो नयाँ कारखानाको उत्पादन क्षमता प्रतिवर्ष दुई हजार चार सय मेट्रिक टन रहेको सेनाले जनाएको छ । अहिले विस्फोटक पदार्थको वार्षिक माग करिब पाँच हजार मेट्रिक टन रहेको जनाइएको छ । नेपाली सेनाद्वारा बुधबार यहाँ आयोजित ‘नेपाली सेनाको उद्योगहरूबाट उत्पादित विस्फोटक पदार्थको वितरण सहजीकरण’ विषयक अन्तत्र्रिmयामा नेपाली सेना, रक्षा उत्पादन (डिफेन्स प्रोडक्सन) विभागका महानिर्देशक अजितवरसिंह थापाले विस्फोटक पदार्थको माग वार्षिक पाँच हजार मेट्रिक टनभन्दा बढी भएको अवस्थामा सेनाले नयाँ प्लान्टको स्थापना गरी माग पूरा गर्ने बताउनुभयो ।
नयाँ प्लान्टबाट उत्पादित विस्फोटक पदार्थ अन्तर्राष्ट्रिय स्तरको रहेको र यसले नेपालको जुनसुकै भूगोलमा समेत काम गर्न सक्ने उहाँले बताउनुभयो । सो अन्तक्र्रियामा नेपाली सेनाका तर्फबाट सुनाचरी इमल्सन प्लान्टमा हालै मात्र आधुनिक मेसिन जडान गरी दुई हजार चार सय मेट्रिक टनको उत्पादन क्षमता, गुणस्तर र मागबमोजिम क्रमिक रूपमा आपूर्ति गर्दै जाने तथा सरल र व्यावहारिक स्वीकृति प्रक्रिया एवं एउटै कार्यालयबाट उत्पादित विस्फोटक पदार्थ सहज रूपमा प्राप्त हुनेसम्बन्धी प्रस्तुतीकरण गरिएको थियो ।
त्यसैगरी, सो अवसरमा विभिन्न परियोजनाहरूका सञ्चालक तथा सरोकारवालाहरूका तर्फबाट यथेष्ट रूपमा गुणस्तर, उत्पादन क्षमता, आपूर्तिको प्रतिबद्धता, मूल्य र समयमै विस्फोटक पदार्थको प्राप्ति सम्बन्धमा जिज्ञासा तथा राय सुझावहरू राखिएको थियो । यसअघि सेनाले काठमाडौँको स्वयम्भू बारुदखानाबाट विस्फोटक पदार्थको उत्पादन गर्दै आएको थियो ।
