पुस २१, विराटनगर। नेपाली कांग्रेसका सभापति एवम पूर्व प्रधानमन्त्री शेरबहादुर देउबाले सरकारले उद्योग चलाउने भन्दा पनि औद्योगिक वातावरण बनाएर उत्पादन वृद्धिमा जोड दिनुपर्ने धारणा व्यक्त गर्नुभएको छ ।
शनिबार मोरङको लेटाङमा नेपाल राष्ट्रिय मगर संघले आयोजना गरेको एक नम्बर प्रदेश स्तरीय प्रशिक्षण कार्यक्रमको उद्घाटन गर्दै सभापति देउबाले सरकारले उद्योग चलाउने कुरालाई पार्टीले गम्भीर रुपमा लिएको जानकारी दिनुभयो । उहाँले सरकारले विभिन्न कर लगाएर उद्योग व्यवसायीलाई मात्र नभइ स्थानीय जनतालाई समेत आर्थिक भार थोपरेकोले कर वृद्धि सच्याउन आग्रह समेत गर्नुभयो ।
सभापति देउबाले मुलुकमा शान्ति सुरक्षाको अवस्था खस्किएको प्रति सरकार गम्भीर हुन नसकेको बताउदै निर्मला पन्तको बलात्कार र हत्या प्रकरणलाई कुनै पनि हालतमा ढाकछोप हुन नदिने बताउनु भयो ।
सभापति कोइरालाले नेपाल वायुसेवा निगमको वाइड बडी प्रकरणको छानबिनका लागि बनाएको आयोगले संलग्न दोषी कसैलाई छाड्न नहुने बताउनु भयो ।
नेपाली कांग्रेसका केन्द्रीय नेताहरु समेत सहभागी सो दुई दिने प्रशिक्षण कार्यक्रममा एक नम्बर प्रदेशका १४ जिल्लाबाट २५० जना प्रतिनिधिहरुको सहभागिता रहेको छ ।
